புத்தெழுச்சியாய் மீட்பாய் விடை

இன்னமும் உறங்கிக் கொண்டிருக்கும் 

தூக்கம் கலை ; 

சோம்பலைத் தழுவும் 

கதகதப்பா உன் நிலை ? 

துணிச்சலுக்கு கொடு விலை ! 

எழுக தொய் மனமே 

அழுந்திக் கிடப்பதில் ஆழமாகாதே ; 

பகலவனைப் பார் 

விடியலுக்குள் பொன்மணித்தேர் 

விரைந்துன் இலக்கு சேர் ! 

அளவீட்டுத் தந்திரம் 

அறிந்தவர் பலர் இங்கே; 

இரு கைகளுக்குள் உலகை மூடு 

வெளிச்சம் உனக்குள் தேடு 

நாளைக்கு வேறு தினம் , இன்றே ஓடு ! 

நடப்பதைக் கவனி 

ஒரு பிடிக்குள் இரையாகவும் 

வசனகர்த்தாக்களுக்குத் திரையாகவும் 

சுயநலப் பாய்ச்சலுக்குக் கரையாகவும் 

பொதுவாய்ச் சம்மணமிட்டிருப்பாய் ! 

தூண்டிலாகு 

பொறுமையின் எல்லை காண்பாய் ; 

தடுமாறத் தவறு 

தலைக்குனிவுகளைத் தணலில் சிதறு 

கிளிப்பிள்ளை சமுதாயம் உதறு ! 

காகிதப் பூக்களுக்கும் 

விலையதிகம் இந்நாளில் ; 

கருத்தினில் சதைப்பற்று பெருக்கு 

அலட்டல்களை உருக்கு 

தோல்வியை சங்கடத்திற்குள் நெருக்கு ! 

சுதந்திரமாய்க் கூடுகட்டு 

தனிமைப் பூங்காவில் ; 

கால்விலங்கு உடை 

கவனம் கையாள ஏது தடை ?! 

புத்தெழுச்சியாய் மீட்பாய் விடை !